Minisitiri w’Ubuzima, Dr. Nsanzimana Sabin, yatangiye uruzinduko rw’iminsi ibiri mu Ntara y’Amajyepfo, rugamije kureba uko serivisi z’ubuvuzi zitangwa mu nzego z’ibanze.
Kuri uyu wa Kane, Minisitiri Dr. Nsanzimana yageze mu Karere ka Nyanza, asura ibigo bitandukanye by’ubuzima birimo Ikigo Nderabuzima cya Nyamiyaga, Amavuriro y’Ibanze ya Giti na Gasoro ndetse n’Ibitaro by’Akarere bya Nyanza.
Muri uru ruzinduko, yarebye imitangire ya serivisi ndetse n’uburyo ibigo nderabuzima bihagaze mu gutanga ubuvuzi abaturage bakeneye.
Minisitiri Dr. Nsanzimana yasabye abakozi bo mu rwego rw’ubuzima gukomeza gushyira imbaraga mu gutanga serivisi zinoze kandi zigerwaho n’abaturage, kuko ari imwe mu nkingi z’ingenzi Igihugu cyiyemeje mu guteza imbere ubuzima bw’Abanyarwanda.
Uru ruzinduko rw’iminsi ibiri mu Ntara y’Amajyepfo rukomeje, aho Minisitiri w’Ubuzima azakomereza mu bindi bikorwa byo gusuzuma imitangire ya serivisi z’ubuvuzi ku rwego rw’ibanze.
