Raporo y’umwaka wa 2026 y’Ibiro by’Akanama k’Umuryango w’Abibumbye gashinzwe Ubukungu muri Afurika (ECA), Ishami rishinzwe Afurika y’Iburasirazuba, yagaragaje ko u Rwanda rukomeje kwandika amateka meza mu izamuka ry’ubukungu, nubwo Isi ikomeje guhura n’ibibazo bitandukanye birimo ihungabana ry’ubukungu.
Nk’uko iyi raporo ibigaragaza, u Rwanda rwabaye igihugu cya mbere mu Karere cyongereye ingengo y’imari ku kigero cya 21% mu mwaka w’ingengo y’imari wa 2025/2026 ugereranyije n’umwaka wabanje.
ECA ivuga ko iri zamuka rishingiye ku cyemezo cy’u Rwanda cyo kongera ishoramari mu nzego zifatizo z’iterambere zirimo ibikorwaremezo, ubuhinzi, gukwirakwiza amashanyarazi, uburezi, ubuvuzi, guteza imbere imiturire ndetse no kubaka Ikibuga cy’Indege Mpuzamahanga cya Bugesera.
Raporo igaragaza ko gukomeza gushora imari muri izo nzego ari imwe mu ngamba zifasha u Rwanda gukomeza kuzamura ubukungu no kongera imibereho myiza y’abaturage, ndetse no guhangana n’ingaruka z’ibibazo by’ubukungu bikomeje kugaragara ku rwego mpuzamahanga.Amakuru dukesha RBA.
