Inteko Ishinga Amategeko ya Uganda yatanze uburenganzira bwo kohereza ingabo z’icyo gihugu mu Ntara ya Gaza muri Palestine, aho zizifatanya n’izindi zo mu butumwa mpuzamahanga bugamije kubungabunga amahoro no gufasha mu ishyirwa mu bikorwa ry’amasezerano y’agahenge hagati ya Israel na Hamas.
Izi ngabo za Uganda zizakorana n’izituruka mu bihugu birimo Indonesia, Maroc, Kazakhstan, Kosovo na Albanie, mu butumwa bwiswe “Peace Mission”, bwashyizweho ku bufatanye na Guverinoma ya Leta Zunze Ubumwe za Amerika iyobowe na Perezida Donald Trump.
Inteko Ishinga Amategeko ya Uganda yavuze ko iki cyemezo kigamije gutanga umusanzu mu kurinda abasivili, kugenzura iyubahirizwa ry’agahenge no gushyigikira ibikorwa bigamije kongera amahoro muri Gaza.
Minisitiri w’Ingabo za Uganda, Kiryowa Kiwanuka, yasobanuye ko igihugu cye gifite ubunararibonye mu bikorwa byo kubungabunga amahoro, yibutsa ubutumwa ingabo za Uganda zagizemo uruhare muri Somalia, Sudani y’Epfo, Repubulika ya Centrafrique no mu butumwa bw’Umuryango w’Abibumbye.
Biteganyijwe ko ubu butumwa buzaba bugizwe n’abasirikare bagera ku 20,000 bayobowe na Maj. Gen. Jasper Jeffers wo muri Leta Zunze Ubumwe za Amerika. Yatangaje ko intego nyamukuru ari ugufasha kugarura umutekano no gushyigikira inzira y’amahoro arambye muri Gaza.
Intambara hagati ya Israel na Hamas yakajije umurego nyuma y’igitero Hamas yagabye muri Israel ku wa 7 Ukwakira 2023, cyahitanye abantu barenga 1,200 ndetse abandi benshi bagashimutwa. Nyuma yacyo, Israel yatangiye ibitero bikomeye muri Gaza, aho imibare yatangajwe n’inzego zaho igaragaza ko abantu barenga 73,000 bamaze kuhasiga ubuzima.
