Ubuyobozi bw’Umujyi wa Kigali bwatangaje ko inyubako 10 zikorerwamo ibikorwa bitandukanye zizafungwa by’agateganyo, mu rwego rwo kugenzura iyubahirizwa ry’amabwiriza yo kwirinda inkongi z’umuriro.
Mu itangazo ryashyizwe hanze ku wa 4 Ugushyingo 2026, Umujyi wa Kigali wamenyesheje abantu bose ko mu rwego rwo gukomeza kugenzura iyubahirizwa ry’amabwiriza yo kwirinda inkongi, izo nyubako zizafungwa by’agateganyo ku wa Gatanu, tariki ya 6 Ugushyingo 2026, saa moya z’umugoroba (19h00).
Inyubako zizafungwa zirimo Catchup Building Gisementi, Agakiriro Gatenga, Agakiriro Gahanga, Rwanda Foam Showroom Gikondo, KAL Plaza Gikondo, N&B Plaza Kigarama, Eden Tower Nyarugenge, Matheus House Nyarugenge, Ntaganzwa House Nyarugenge na Ndaru Arcade Nyarugenge.
Umujyi wa Kigali wavuze ko izi ngamba zigamije kurengera ubuzima bw’abantu n’imitungo yabo, harimo ba nyir’ibikorwa by’ubucuruzi, abakozi n’abakiriya. Wongeyeho ko ba nyir’izi nyubako, abazicunga n’abandi bireba basabwa kwihutira gukemura ibibazo byagaragaye mu bijyanye no kwirinda inkongi.
Ubuyobozi bw’Umujyi wa Kigali bwashimangiye ko inyubako zose zizuzuza ibisabwa mu kwirinda inkongi zizemererwa kongera gufungura, zikimara kugenzurwa no kwemezwa ko zujuje ibisabwa.
Bwibukije ba nyir’inyubako n’abazicunga gukomeza kubahiriza amabwiriza yo kwirinda inkongi, hagamijwe kurinda ubuzima n’umutekano by’abazituyemo, abazikoreramo n’abazigana.
Aya mabwiriza aje mu gihe hakomeje kugaragara inkongi nyinshi zitegeze zibaho mu gihe cyatambutse. Izi nkongi zateje akaga ndetse n’igihombo ku mpande zitandukanye harimo abakoreraga mu nyubako zahiye, nyir’inyubako ndetse n’abandi.
