Papa Leo XIV yashimiye abaganga, abaforomo n’abandi bakozi bo mu bitaro bya Gemelli biherereye i Roma mu Butaliyani, bamwitayeho mu gihe yari aharwariye. Yashimiye kandi abantu bose bamwifurije gukira no kumusabira nyuma yo kubagwa ikibyimba cya kanseri yari afite mu bihaha.
Ibi yabivuze ku Cyumweru, tariki ya 18 Ukwakira 2026, ubwo yasozaga isengesho rya Angelus, agaragaza ko ashimira abamugaragarije urukundo n’ubufasha mu gihe yari ahanganye n’ibibazo by’ubuzima.
Nk’uko ikinyamakuru Vatican News kibitangaza, Papa Leo XIV yashimiye by’umwihariko itsinda ry’abaganga, abaforomo n’abandi bakozi b’ibitaro bya Gemelli, bamwitayeho ubwo yari amaze kubagwa kugira ngo akurirwemo ikibyimba cya kanseri cyari mu bihaha bye.
Yavuze ko ibihe by’uburwayi yanyuzemo byatumye arushaho kwiyumvamo ubusabane n’abantu bahura n’indwara ndetse n’abafite intege nke z’umubiri.
“Ibi bihe byatumye numva mu buryo bwihariye ko ndi hafi y’abantu bose bari kunyura mu burwayi cyangwa bafite intege nke z’umubiri.”
Ku wa Gatandatu, tariki ya 17 Ukwakira 2026, Papa Leo XIV yasezerewe mu bitaro nyuma y’uko ibizamini by’amaraso n’amafoto y’ibihaha byakozwe mu gitondo bigaragaje ko ashobora gusubira mu rugo.
Mbere yo kuva mu bitaro, yashimiye imbonankubone umuganga wamubaze, abandi baganga n’abaforomo, abakozi bashinzwe ubuvuzi, umuyobozi wa Kaminuza Gatolika y’Umuryango Mutagatifu w’Umutima wa Yezu ndetse n’ubuyobozi bw’ibitaro.
Mu butumwa bwe, Papa Leo XIV yatangaje ko agiye gusubukura inshingano ze buhoro buhoro, nyuma y’igihe yari amaze yitabwaho by’umwihariko n’abaganga.
“Ubwo iki cyiciro kigoye tukirenze, nk’uko mubizi, ngiye gusubukura ibikorwa byanjye buhoro buhoro, mfashijwe n’Imana n’amasengesho yanyu.”
Mbere y’uko abagwa, Ibiro bishinzwe ibikorwa bya Papa byari byatangaje ko gahunda zose yagombaga kwakiramo abantu zahagaritswe kugeza ku wa Kabiri, tariki ya 20 Ukwakira 2026.
Gusezererwa kwa Papa Leo XIV mu bitaro no gutangaza ko azasubukura imirimo ye gahoro gahoro bigaragaza intambwe yateye mu gukira, mu gihe akomeje gukurikiranwa n’abaganga.
