Umugaba Mukuru w’Ingabo z’u Rwanda, Gen MK Mubarakh Muganga, na Maj Gen Alex Kagame basuye ikipe ya APR FC, bayitera ingabo mu bitugu mbere y’umukino irahuramo na Zamalek SC yo mu Misiri muri CAF Champions League.
Gen Mubarakh Muganga yasabye abakinnyi ba APR FC gukina neza nk’uko babigenje basezerera Les Aigles du Congo, abashishikariza gukora ibishoboka byose kugira ngo bongere gushimisha abanyarwanda.
Ku rundi ruhande, Umugaba Mukuru w’Inkeragutabara, Maj Gen Alex Kagame, yasangije abakinnyi ibanga ryabafashije gutsinda Zamalek SC mu 2004, ubwo yayoboraga APR FC.
“Nta kindi gitanga intsinzi, ni ugushyira hamwe nk’ikipe […] hagati yanyu muganire, muhane ibitekerezo, ahasigaye musenyere umugozi umwe kandi twese tubari inyuma.”
Umukino ubanza w’ijonjora rya kabiri rya CAF Champions League urahuza APR FC na Zamalek SC uteganyijwe kuri uyu wa Gatanu, tariki ya 16 Ukwakira 2026, saa 18:00, kuri Stade Amahoro i Kigali.
