Bamwe mu rubyiruko rw’abakorerabushake mu Karere ka Huye basabwe gukomeza kugira uruhare mu kubungabunga umutekano, gutanga amakuru no gufasha abaturage gukemura ibibazo bibangamiye imibereho yabo.
Ibi byagarutsweho kuri uyu wa 28 Nzeri 2026 mu biganiro byabahuje n’inzego zitandukanye .
Umuyobozi w’Akarere ka Huye wungirije ushinzwe imibereho myiza y’abaturage, Kankesha Annonciata, yasabye urubyiruko kwegera abaturage no kugira uruhare mu gukemura ibibazo bibangamiye imibereho yabo.
“Turabasaba gukomeza kwegera abaturage, kumenya ibibazo bafite no kubafasha kubishakira ibisubizo.”
Umukozi ushinzwe ibikorwa by’ubukorerabushake muri MINALOC, Kabanda JMV, yabibukije ko ari abafatanyabikorwa mu kugira uruhare no guteza imbere umutekano n’imiyoborere myiza.
“Abakorerabushake b’urubyiruko ni abafatanyabikorwa b’ingenzi mu kubungabunga umutekano no guteza imbere imiyoborere myiza.”
Umuhuzabikorwa w’urubyiruko rw’abakorerabushake muri Polisi y’u Rwanda, CSP Urujeni Jacky, yasabye urubyiruko gukomeza kugira uruhare mu gukumira ibyaha no gukorana n’inzego zitandukanye harimo n’inzego z’umutekano.
“Urubyiruko rw’abakorerabushake rufite uruhare rukomeye mu gukumira ibyaha. Turabasaba gukomeza gutanga amakuru ku gihe kandi vuba no gukorana n’inzego.”
Umuyobozi w’Ingabo mu Turere twa Huye, Gisagara na Nyaruguru, Lt Col M. Kanamugire, na we yabigarutseho asaba urubyiruko kugira uruhare mu gukumira ibyaha, kwirinda ibiyobyabwenge no kubungabunga umutekano bafatanya n’ingabo z’igihugu.
Umwe mu rubyiruko rw’abakorerabushake witabiriye ibi biganiro yavuze ko biteguye gukomeza gufasha abaturage mu mutekano n’ibikorwa by’iterambere nk’uko bakomeje kubisabwa.
“Tugiye gukomeza gutanga amakuru ku gihe, kwirinda ibiyobyabwenge no gufasha abaturage mu bibazo bibabangamiye.”
Muri ibi biganiro, bibukijwe kwirinda ibiyobyabwenge n’ibinyobwa bitujuje ubuziranenge, no kugira uruhare mu gusubiza abana bata ishuri ishuri.
