Lionel Messi yasezeye mu ikipe y’igihugu ya Argentine nyuma yo kuyifasha gutsinda Bénin ibitego 3-0, mu mukino wa gicuti wabereye kuri Estadio Monumental muri Argentine.
Uyu mukino wabaye uwanyuma Messi yakiniye Argentine, aho yagize uruhare mu bitego byose bitatu. Yatanze imipira ibiri yavuyemo ibitego, mbere yo gutsinda igitego cya gatatu.
Messi asoje urugendo rw’imyaka 21 mu Ikipe y’igihugu afite imibare ikomeye. Yakiniye Argentine imikino 208, ayitsindira ibitego 126 ndetse atanga imipira 70 yavuyemo ibitego.
Muri Argentine, Messi yegukanye ibikombe bikomeye birimo igikombe cy’Isi cy’abatarengeje imyaka 20 mu 2005, Umudali wa Zahabu mu Mikino Olempike ya 2008, Copa América inshuro ebyiri mu 2021 na 2024, Igikombe cy’Isi cya 2022 ndetse na Finalissima ya 2022.
Usibye ibyo yagezeho mu ikipe y’igihugu, Messi yagize umwuga ukomeye mu makipe nka FC Barcelone, Paris Saint-Germain na Inter Miami, ari na byo byamufashije gutwara Ballon d’Or inshuro umunani.
Nyuma y’uyu mukino, Messi asezeye ku rwego rw’ikipe y’igihugu asize amateka akomeye mu mupira w’amaguru, cyane cyane muri Argentine aho yabaye umwe mu bakinnyi bagize uruhare runini mu bihe bikomeye by’ikipe.
