The Ben na Diamond Platnumz bateguye ibirori byihariye byo guhura n’abafana babo ndetse n’abazitabira ibirori byihariye bizabera i Kampala muri Uganda.
Ibi birori byiswe “Meet and Greet” biteganyijwe mu ijoro ryo ku wa 29 Ukwakira 2026, bikabera muri Kampala ahazwi nka Marriott Hotel, aho abazitabira bazabona umwanya wo kwifotozanya n’aba bahanzi ndetse bagasangira ifunguro ry’umugoroba.
Ubusabane buzaba umunsi umwe mbere y’igitaramo cya “Comedy Store”, giteganyijwe ku wa 30 Ukwakira 2026, aho The Ben na Diamond Platnumz nabo bazaba bari mu bahanzi bazasusurutsa abazitabira ibi birori.
Ibi birori bya “Meet and Greet” bizasusurutswa na Sheila Gashumba, usigaye ukoresha izina rya DJ Lil Stunner, ndetse na Myko Ouma, umucuranzi uzobereye kuri guitar.
Kwinjira muri ibi birori bisaba kwishyura miliyoni 1.8 Frw, bigatuma ari ibirori byateguriwe umubare muto w’abifuza kubona aba bahanzi mu buryo bwihariye.
Ni kimwe mu bikorwa bizabanziriza igitaramo cya “Comedy Store”, aho The Ben na Diamond Platnumz biteganyijwe ko bazongera guhura n’abakunzi babo muri Uganda.
