Minisitiri Nelly Mukazayire yasabye Rayon Sports kuzegukana CECAFA Kagame CupMinisitiri wa Siporo, Nelly Mukazayire, yashimiye Rayon Sports nyuma yo kugera ku mukino wa nyuma w’irushanwa rya CECAFA Kagame Cup 2026, ayisaba gukomeza urugendo rwo guhesha u Rwanda igikombe.
Rayon Sports yabonye itike ya nyuma nyuma yo gutsinda Jamus SC yo muri Sudani y’Epfo ibitego 3-1, mu mukino wa 1/2 wabaye ku wa Kabiri tariki ya 4 Kanama 2026 kuri Kigali Pelé Stadium.
Nyuma y’uyu mukino, Minisitiri Mukazayire yanyujije ubutumwa ku mbuga nkoranyambaga ashimira iyi kipe, anagaragaza ko yifuza ko igikombe gisigara mu Rwanda.
“Oh Rayon! Mukomeze umuvuno, intego ikomeze kuba yayindi… Igikombe kirasigara iwacu kuri uyu wa Gatanu.”
Rayon Sports izacakirana na Gor Mahia FC yo muri Kenya ku mukino wa nyuma uteganyijwe ku wa Gatanu, tariki ya 7 Kanama 2026, saa 18:00 kuri Stade Amahoro. Gor Mahia yageze ku mukino wa nyuma isezereye Al Hilal SC yo muri Sudani.
Abakunzi b’umupira w’amaguru mu Rwanda bazaba bategereje kureba niba Rayon Sports izasoza iri rushanwa yegukanye igikombe cya CECAFA Kagame Cup kikaguma mu Rwanda, nk’uko Minisitiri wa Siporo yabigaragaje mu butumwa bwe.
